په بامیانو کې د یوه جوړ شوي پروګرام ګډوډول؛ طالبانو ښځې ګواښلې دي

په بامیانو کې د ښځو لخوا د طالبانو د«صحنه جوړې شوې» ملاتړ غونډې ګډوډولو څخه وروسته، اوس طالبانو یو شمېر یادې ښځې ګواښلې دي.

په بامیانو کې سیمه ییزې سرچینې اماج ته ویلي؛ چې ښځینه زده کوونکو د ملاتړي پروګرام په غبرګون کې د طالبانو بینرونه څیرې کړي.

د سرچينې په وینا، د باميانو پوهنتون مسوولينو له ښځينه محصلينو غوښتي وو، چې د باميانو په ورزشي اسټډیوم کې د ښځو د حقونو څخه د ملاتړ پروګرام کې ګډون وکړي، خو کله چې نجونو پروګرام کې ګډون وکړ، پوهې شوې، چې دغه پروګرام د ښځو له حقونو څخه د ملاتړ نه، بلکې له طالبانو څخه د ملاتړ لپاره جوړ شوى دى. او د طالبانو په ملاتړ او د امریکا لخوا د مرکزي بانک د بهرنیو اسعارو د زیرمو د خلاصون په اړه بینرونه په دیوالونو ځړول شوي.

د خپرونې یوه ګډونواله چې نه یې غوښتل نوم یې واخیستل شي، آماج ته یې وویل چې د طالبانو له خوا ورسره اړیکه نیول شوې او ګواښل شوې.

نوموړې زياتوي، چې دې پروګرام ته يې ٥٠ کسان رابللي وو او هغه درې تنه دي چې بینرونه یې څیرې کړي د نوموړې له خوا ورپېژندل شوي و.

نوموړې په دوام کې وویل: « طالبان پر ما دا تور لګوي چې له کوم کس یابنسټ څخه مې د دې کړنې په پار پیسې اخیستې دي تر څو د دوی پروګرام ګډوډولو لپاره په پروګرام کې لاریونکونکې معرفي کړم.»

دا پېښه چې درې ورځې وړاندې په بامیانو کې وشوه، په ټولنیزو رسنیو کې یې ډېر غبرګونونه راپارولي او طالبان دا کړنه یې د ولسي ملاتړ د نشتوالي نښه بللې. طالبانو تر اوسه په دې اړه څه نه دي ویلي.