شاوخوا یوه میاشت کېږي چې د طالبانو له خوا د بدخشان لپاره ټاکل شوی والي عبدالغني فایق له دغه ولایته وتلی او بېرته نه دی راغلی. نه شتون چې پوښتنې راپورته کوي.
خو د بدخشان ولايت د اطلاعاتو او فرهنګ رييس معزالدين عزيزي د دې ګونګوسې په غبرګون کې وويل چې فايق په کابل کې دى. او د طالبانو له مشرانو سره د ولایت د راتلونکو ستونزو او پلانونو په اړه خبرې کوي. د طالبانو یوې بلې سرچینې ویلي چې نوموړی له خپلې کورنۍ سره د لیدو لپاره پاکستان ته تللی و.
په بدخشان کې د طالبانو د والي د یوې میاشتې غیرحاضري په اړه پوښتنې په داسې حال کې راپورته کیږي چې یو شمیر سرچینې دغه ولایت ته د کوچیانو د لیږدولو لپاره د طالبانو د پلان خبره کوي. سرچینې وايي، طالبان په بدخشان کې د کوچیانو د ځای پر ځای کولو په لټه کې دي، چې د دغه ولایت والي یې مخالفت کړی دي.
سرچینې زیاتوي چې د کوچیانو د ځای پر ځای کولو له پلان سره د بدخشان د والي مخالفت د طالبانو مشرتابه په غوسه کړی دی. او حتی عبدالغني فایق هم کندهار ته د ځواب ویلو لپاره راغوښتل شوی وو او د طالبانو له حکم سره د مخالفت له امله اوس په کابل کې بی سرنوشته ژوند کوي.
کوچیان ادعا کوي چي د ظاهر شاه د ظهور راهیسې د بدخشان د مالکیت سند لري. د دوی په وینا دغه اسناد د برهان الدین رباني د واکمنۍ پر مهال لغوه شوي وو.
