د امریکا د بهرنیو چارو او دفاع وزیرانو د اوکراین له ولسمشر سره وکتل

د اوکراین د ولسمشر سلاکار, اولکسي آرستوچ اعلان وکړ چي د امریکا د بهرنیو چارو وزیر انتوني بلینکن او د امریکا د دفاع وزیر لوید آسټن کي‌يف ته راغلي او د اوکراین له ولسمشر ولادیمیر زیلینسکي سره په خبرو اترو بوخت دي.

خو سپینې ماڼۍ، د بهرنیو چارو وزارت او یا دفاع وزارت تر اوسه د دغه سفر پخلی نه دی کړی او په دې اړه له څه ویلو یې ډډه کړې.

د امریکايي چارواکو له خوا د دغه خبر د تایید په صورت کي، پر اوکراين باندي د روسيې د پوځي بريد د دوو میاشتو له تېرېدو دا به د امريکايي لوړپوړو چارواکو لومړی ځل وي چي له دې هیواده ليدنه کوي.

تر دې مخکې ښاغلي زیلینسکي د شنبې په ورځ په یوه خبري کنفرانس کې اعلان وکړ چې د امریکا د بهرنیو چارو وزیر او د دفاع وزیر به د یک‌شنبې په ورځ کی‌یف ته سفر وکړي.

له سی ‌ان ان  سره په یوه تلویزیوني مرکه کې ولادیمیر زیلینسکي د امریکا له ولسمشر جوبایډن څخه وغوښتل چې اوکراین ته سفر وکړي.

امریکايي چارواکو اعلان کړی و چې ښايي د امریکا دفاع یا بهرنیو چارو وزیر اوکراین ته سفر وکړي. خو دا ليرې خبره ده چي ولسمشر بایډن دې هیواد ته سفر وکړي.

د یادوني وړ ده چي تر اوسه پورې د بريتانيا لومړي وزير بوريس جانسن، د پولنډ لومړي وزير ماتيس موراوسکي، د چک جمهوريت مشر پيتر فيالا، د سلوانيا لومړي وزير یانز یانسا، د اتريش صدراعظم کارل نهمر او د اروپايي اتحاديې د کميسون مشر اورسولا فون در لاین د اوکراین له ولسمشر سره د کتني لپاره کي‌یف ته يې سفرونه کړي دي.

دا په داسي حال کي ده چي پر اوکراین د روسیې له یرغل راهیسې تر ۶ میلیونو ډېر خلک له خپلو کورونو تښتېدلي او زرګونه نور هم خپل ژوند له لاسه ورکړی دی.