د طالبانو د لوړو زده کړو وزارت د نوې پرېکړې له مخې له دې وروسته به پوهنتونونو کې نارینه او ښځینه محصلین په جلا جلا ورځو کې تدریس کېږي.
د نوي مهال وېش پر اساس د شنبې, دوشنبې او چهارشنبې ورځي نجونو او د يکشنبې, سهشنبې او پنجشنبې ورځي هلکانو ته ځانګړي شوي.
د نجونو او هلکانو د جلاوالي د نوي مهال وېش په اساس, درسي ساعتونه به د سهار له اتو بجو بیا د ماسپښين تر درو بجو دي.
طالبانو دا هم ویلي چې د پوهنتونونو، پوهنځيو او دروازو کې د نشراتو د ریاست د لګول شویو پوسټرونو له مخې د حجاب مسله خورا جدي ده.
تر دې وړاندي دغه وزارت په کابل پوهنتون کې د اسلامي ثقافت مضمون له ۸ کریډیټونو څخه ۲۴ کریډیټونو ته لوړکړې و.
خو د پوهنتون يو شمېر استادانو اندېښنه ښودلې، چې ښايي طالبان په افغانستان کې د پوهنې د له منځه وړلو لپاره يو بهرنى پلان عملي کړي، د دوی په وينا نارينه او ښځې په بازارونو، روغتونونو او هر ځاى کې ګډې دي.
د دوی په وینا په دې کار سره د پوهنتون علمي سطحه کښته کيږې.
