په افغانستان کې له ماشومانو څخه د ملګرو ملتو د ملاتړ صندوق (یونیسف) استازی محمد ایویا وایي؛ چې یوازې تېرو دوه ورځو کې دې هېواد کې ۱۷ ماشومانو ژوند له لاسه ورکړی.
له ماشومانو څخه د ملګرو ملتونو د ملاتړ صندوق استازي (جمعه د غبرګولي ۶مه) په یو ټویټ کې ویلي؛ چې د تېرې اونۍ چهارشنبه او پنجشنبه ورځو کې د بلخ او کابل بریدونو کې ۱۶ماشومانو او له جګړې د پاتې شوي چاودېدونکو توکو د چاودنې له امله په اروزګان کې یو ماشوم ژوند له لاسه ورکړی.
نوموړي په دې سره په ټینګار چې دا وضعیت باید پای ته ورسېږي زیاته کړې؛ چې افغانستان کې د ماشومانو سخته مرګ ژوبله باید ودرېږي.
دا په داسې حال کې ده؛ چې افغانستان کې د بشر حقونو لپاره د ملګرو ملتونو ځانګړي راپور ورکوونکي هم ویلي وو، چې د کابل او بلخ بریدونو کې د ۱۶ ماشومانو په ګډون څو ملکي وګړي وژل شوي.
د بلخ ولایت مرکز مزارشریف ښار (چهارشنبه د غبرګولي ۴مه) د درې پرله پسې چاودنو شاهد وو.
دا چاودنې د مزارشریف ښار په پینځمه او لسمه ناحیه کې شوې دي. داعش ډلې د یادو چاودنو مسوولیت پر غاړه اخیستی.
بل پلو نن سهار کندز کې هم د هاوان مرمۍ د چاودېدو په پایله کې، دوه ماشومانو ژوند له لاسه ورکړ او یو بل ماشوم ټپي شوی.
