په ملګرو ملتونو کې د پاکستان استازی: له سیمه‌ییزې اجماع وروسته د طالبانو رژیم په رسمیت پېژنو

د پاکستان «ډان» ورځپاڼې راپور ورکړی؛ چې په ملګرو ملتونو کې د پاکستان دایمي استازي منیر اکرام ویلي: «له سیمه‌ییزې اجماع وروسته د طالبانو رژیم په رسمیت پېژنو.»

اکرام (پنجشنبه ورځ د کب ۲۶مه) دا مطلب په په افغانستان کې د یاد سازمان د ماموریت له تمدید سره په ورته وخه کې څرګند کړی.

نوموړي زیاته کړې: «موږ به دا کړنه (په رسمیت پېژندل) هغه مهال ترسره کړو چې یوه اجماع په ځانګړي ډول د سیمې هېوادونو تر منځ ترسره شي.»

ډان نیوز همداشان راپور ورکړی؛ چې د طالبانو په رسمیت پېژندل به د افغانستان په اړه د چین په غونډه کې د بحث یوه مهمه موضوع ووسي.

د راپور له مخې؛ په دې ناسته کې چې راتلونکې کیلادي میاشت به ترسره شي، د کوربه هېواد سربېره به، ایران، پاکستان، تاجېکستان، ترکمنستان او اُزبېکستان هم ګډون وکړي.

د ملګرو ملتونو امنیت شورا پنجشنبه ورځ په افغانستان کې د یاد سازمان «یوناما» د ماموریت دوام ته رایه ورکړه.

په ملګرو ملتونو سازمان کې د پاکستان استازي په دې اړه صادر شوي پرېکړه لیک بلندې نیوکه وکړه او ویې ویل؛ چې په هغه کې د افغانستان «بالفعل» حکومت ته هېڅ اشاره نه ده شوې.

په افغانستان کې د طالبانو له واکمنۍ د اوو میاشتو په تېرېدو سره؛ تر اوسه هېڅ هېواد د دوی حکومت په رسمیت نه دی پېژندلی.

که څه هم پاکستان لومړنی هېواد و، چې له طالبانو سره د زیات تعامل غوښتونکی شو، خو اسلام آباد هم لا د طالبانو حکومت په رسمیت نه دی پېژندلی.