د ملګرو ملتونو سازمان سرمنشي: په اوکراین کې د جګړې درېدو وخت رارسېدلی

د ملګرو ملتونو سرمنشي آنتونیو ګوترش د دې په ویلو سره چې اوکراین په اور کې سوځي، وویل: «د دې وخت رارسېدلی چې د اوکراین خلکو په وړاندې رامنځته شوی وحشت ودروو او د سولې لاره خپله کړو.»

ګوترش زیاتوي: « د هر ساعت په تېرېدو سره ښکاري چې وضعیت کړکېچن کېږي او دا جګړه هېڅ ګټونکی نه لري.»

نوموړي څرګنده کړې؛ چې د روغتیا نړیوال سازمان د راپورونو پر بنسټ، لږ تر لږه ۲۴ روغتیایي مرکزونو د برید موخه ګرځېدلي.

د ملګرو ملتونو سرمنشي همداشان د اظطراري مرستو له صندوق څخه د اوکراین له خلکو سره د ۴۰ میلیون ډالره نورې مرستې څخه هم خبر ورکړی.

نوموړي ټینګار کړی؛ چې لږ تر لږه دوه نیم میلیون کسان بې ځایه شوي او دا شمېره ورځ تر بلې په ډېرېدو ده. نوموړي زیاته کړې: «زه د اوکراین له ګاونډیو هېوادونو او نورو هېوادونو مننه کړم؛ چې څه باندې ۲.۸ میلیون اوکراینیانو ته یې پناه ورکړې.»

نوموړي په دوام کې وویل؛ چې دا غوښتنه باید د سولې لپاره واورېدل شي او د ډیپلوماسۍ او خبرو اترو لپاره هېڅکله ناوخته نه ده.

د ګوترش خبرې په داسې حال کې کېږي؛ چې پر اوکراین د روسیې برید شل ورځې وړاندې پیل شو.

د اوکراین په ښارونو کې جګړه دوام لري او اوکرایني چارواکي وایي، چې روسیه پر ښارونه بمونه اوروي او موشکي بریدونه کړي.

سیمه‌ییزو رسنیو نن سهار راپور ورکړی چې د اوکراین پلازمینې په لوېدیځه څنډه کې دوه لویې چاودنې شوې دي.