د انګلستان نوې لومړۍ وزیرې: په بریتانیا کې د ژوند د لګښتونو د بحران سره د مقابلې لپاره لاس په کار کېږم

د بریتانیا نوې لومړۍ وزیرې، لیز تراس په خپله لومړۍ وینا کې ژمنه کړې چې په بریتانیا کې د ژوند د لګښتونو د ناورین سره د مقابلې لپاره به سمدستي لاس په کار کیږي.

اغلې تراس تېره ورځ (سه شنبه) ویلی: «موږ په ګډه کولی شو د اقتصادي ستونزو له توپان څخه چې دا هیواد ورسره مخ دی، را ووځو.» هغې زیاته کړې چې د پوتین د جګړې له امله د انرژۍ له بحران سره مقابله کوي.

نوموړې زیاته کړې چې کاري لومړیتوبونه د اقتصاد د ودي لپاره د مالیاتو کمول، د بیو لوړېدو په جریان کې د انګلستان د انرژۍ امنیت ښه کول او د ملي روغتیا خدماتو جوړول دي.

د یادولو وړ ده چې لیز تراس د ټاکنیزو رقابتونو ترشا پرېښولو سره، د انګلستان په تاریخ کې درېمه ښځینه لومړۍ وزیره شوه.

نوموړې د بریتانیا په تېر دولت کې د بهرنیو چارو وزیره وه او د محافظه کار ګوند د رهبرۍ په سیالۍ کې د تر ټولو ډېرو رایو په ګټلو سره د بریتانیا لومړۍ وزیره شوه.