د پاکستان دي نېشن ورځپاڼه: داعش په افغانستان کې جدي ګواښ دی

لخوا Aamaj News

د پاکستان دي نېشن ورځپاڼه په یوه راپور کې ویلی د ملګرو ملتونو د وروستیو روایتونو پر بنسټ چې د القاعدې او داعش په ګډون ترهګري ډلي په افغانستان کې د بیا راژوندي کېدو په حال کې دي، دا هیواد کولای شي نورو هیوادونو ته جدي ګواښ وي.

دغه پاکستانۍ ورځپاڼه زیاته کړې، له کومه چې داعش مخکې په افغانستان کې ګڼ شمېر بریدونه سرته رسولي دي، دغه ډله توانېدلې په کمه موده کې، د طالبانو حکومت ته تر ټولو لوی او مهم ګواښ شي او دغه هیواد په سیمه کې د خپل خلافت خوب د رښتیا کېدو لپاره اډه وګڼي.

په دغه راپور کې راغلی چې داعش لاهم د طالبانو په ګډون له څو ترهګرو ډلو څخه ناخوښ جنګیالي ګوماري. دغه ورځپاڼه ویلی چې وروستیو راپورونو دا ثابته کړې چې افغانستان القاعدې لپاره ارام بستر دی او ځیني جګپوړي چارواکي یې طالبانو ته مشورتي خدمتونه وړاندي کوي.

برسېره پر دې، د پاکستان دي نېشن ټینګار کړی ښکاري چې د اقاعدې مشر ایمن الظواهري هم په افغانستان کې دی.

د پاکستان دغه مشهوره ورځپاڼه په افغانستان کې له درو تر څلورو زرو پاکستاني طالبانو شتون ته په اشارې سره ویلی چې تر داعش وروسته په افغانستان کې تر ټولو لویه بهرني ترهګرې ډله پاکستاني طالبان دي.

دغه راپور په افغانستان کې د پاکستاني طالبانو حضور ګاونډیو هیوادونو په ځانګړی ډول پاکستان ته د اندېښنې وړ بللی او زیاته کړې ده: «هر څومره ډېر چې له افغانستانه سترګي پټي شي په دغه هیواد کې د یادو ډلو فعالیتونه آسانه کیږي.»

دي نېشن لیکلی چې دغي موضوع ته د رسیدګۍ لپاره اسلام آباد له طالبانو سره همکارۍ ته دوام ورکوي.

دا په داسي حال کې ده چې طالب چارواکو تل ویلي چې د افغانستان له خاوري هیڅ هیواد ته ګواښ نشته.

اړوند لیکنې

یو نظر پریږدئ