طالبانو د ۲۰۹شاهین قول اردو د ارکانو پخوانی رییس یې له زوی او درې کسه خپلوانو سره نیولی

لخوا Aamaj News

په تېر حکومت کې د شاهین ۲۰۹ قول اوردو د ارکانو رییس ډګروال آدینه محمد آزاد خپلوان آماج ته وایي؛ چې نوموړی، زوی یې او درې کسان خپلوان یې د طالبانو لخوا نیول شوي.

دوی زیاتوي چې طالبانو ډګروال آزاد د (یکشنبې د چنګاښ ۲۶مه) ورځ د کابل – بغلان لارې په اوږدو کې د «مېخک» سیمه کې نیولی او د بغلان خنجان ولسوالۍ ته یې بوولی.

د یاد پخواني پوځي خپلوان زیاتوي چې طالبانو له وهلو ډبولو وروسته د نوموړي زوی او دوه خپلوان له بندخونې خوشي کړي.

د دوی په وینا؛ ډګروال آزاد او د رحیم‌الله په نوم یو کس خپلوان یې؛ د پخواني حکومت د پامیر قول اوردو د استخباراتو او کشف مدیر، لاهم د طالبانو په بند کې دي او کورنۍ یې له برخلیک څخه مالومات نه لري.

طالبانو د تېر کال زمري میاشتې ۲۴ مه افغانستان کې له واک ته رسېدو سره؛ عمومي بښنه اعلان کړه او ویې ویل چې د تېر نظام امنیتي او دفاعي ځواکونه له هېڅ ډول وېرې پرته خپل عادي ژوند ته دوام ورکولی شي.

خو د دې ډاډ سربېره؛ څو ځلې داسې راپورونه خپاره شوي چې طالب ځواکونه د پخواني حکومت پوځیان په بېلابېلو بهانو او بېلابېلو ولایتونو کې نیولي، وهلي ډبولي او په قتل یې رسولي؛ هغه موضوع چې تل یې طالبان رد کوي.

اړوند لیکنې

یو نظر پریږدئ