د طالبانو د بهرنیو چارو وزارت سیاسي مرستیال، شېر محمد عباس ستانکزي په متحده عربي اماراتو کې یو شمېر افغان سوداګرو ته په وینا کې وویل چې په افغانستان کې اقلیت او اکثریت نشته، افغانان ټول یو لاس، یو ملت او اکثریت دي.
نوموړي د دې ليدني پر مهال نړۍ او د افغانستان ګاونډیانو ته خبرداری ورکړ، چې که د افغانستان په کورنیو چارو کې لاسوهنه وکړي، طالبان د هغوی د مقابلې توان لري.
ښاغلی ستانکزی زیاته کړې: «هر هغه څوک چې افغانستان او زموږ پولو ته په بده وګوري، موږ د هغوی د خولې او پښې د ماتولو واک لرو.»
د طالبانو د بهرنیو چارو وزارت مرستیال زیاته کړې: «موږ له دې هېواد څخه د دفاع لپاره څلوېښت کاله په میلیونونو افغانان قرباني کړی، موږ به دا خاوره د هیچا لپاره نه پریږدو.» هغه زیاته کړې چې افغانان کولای شي د خپلو دښمنانو پر وړاندې سل کاله نور هم جګړه ودریږي.
هغه ويلی چې نړۍ او ګاونډیان باید د افغانستان په کورنیو چارو کې لاسوهنه ونه کړي.
شېر محمد عباس ستانکزي څه موده وړاندې ويلي وو چې امريکايي جنرالانو ته يې توصیه کړې ده چې په نړۍ کې دوه زبرځواکونه دي؛ لومړی امریکا او دوهم طالبان.
دا په داسي حال کې ده چې پر افغانستان باندي د طالبانو د بیا واک تر لاسه کولو راهیسې، د دوی سرحدي ځواکونه څو ځلې د افغانستان له ګاونډیو سره نښتې دي.
