د احمدشاه مسعود مقبرې ته څېرمه د طالب یو شمېر ځواکونو د نڅا او سندرو د ویدیو له خپرېدو سره یو شمېر پخوانیو سیاسي څېرو، خبریالانو او د رسنیو فعالانو د طالبانو پر دغه اقدام نیوکه کړې او دا یې «د سپکاوي نڅا» بللې ده.
په ملګرو ملتونو کې د افغانستان پخواني استازي محمود صیقل د طالبانو د دغي کړني په غبرګون کې ویلي، چې طالبان هېڅکله هم د سولي اهل نه وو او نه دي.
د هغه په وینا، بدلون د طالب او د هغه د طرحه کوونکو له ماهیت او څرنګوالي سره په ټکر کې دی. هغه زیاته کړه: «مهرباني وکړئ ځان او نړۍ لا ډېر مه دوکه کوئ.»
په ملګرو ملتونو کې د افغانستان پخواني استازي په یو ټویټ کې لیکلي: «چیرته دي هغه ټول (معتدل او خړ) طالبان او صوفیان چې د شتون ادعا کوي ترڅو د دغو موجوداتو تر ټولو ناوړه اعمال وغندي او نور توجیهات پریږدي؟»
په همدې حال، د هیواد شاعره او لیکواله، حمیرا قادري، د دغي مو ضوع په اړوند په یو ټویټ کي ليکلی: «نڅا وکړئ ډیره هم ښه ده. خو ولې په يو مقبره کې؛ هغه هم د امیر صاحب شهید په مقبره کې.»
هغې زیاته کړې: «د توکمیزي برتري ډول مه وهئ، چې د بقا لامل نه دی. موږ ډېر لیدلي دي.»
له بلې خوا، نقیب اروين یو خبریال وايي چې احمدشاه مسعود د خپل دوست او دښمن په وینا «د میدان سړی» و. د هغه پر قبر نڅا کول پرته له دې چې د پیوستون لړزېدلي بنسټونه په بدمرغۍ بدل کړي نه اسلامي، نه افغاني او نه هم انساني دود دی .
د رسنیو فعال عبادالله موسوي د دې مسلې په غبرګون کې لیکلي: «دا د سپکاوي نڅا ده.»
هغه زياته کړه چې فاشيزم د مزاري قبر ويجاړ کړ، مجسمه يې ورانه کړه، د مسعود قبر يې وران کړ او پر قبر يې نڅا وکړه.
د هغه په وينا، فاشيزم او قبيلوي فکر له غير قبيلوي ارزښتونو سره نه خلاصېدونکي ستیز لري. د ښاغلي موسوي په وینا، په دې کار سره طالبان غواړي ووايي، وژنو مو او سپکاوی به مو وکړو.
دا ټول په داسې حال کې دي چې پرون په پنجشیر ولایت کې د قومندان احمدشاه مسعود مقبرې ته څېرمه د طالبانو د سندرو او اختریز اټن ویډیووي په ټولنیزو رسنیو کې خپرې شوې.
