قریشي: په افغانستان کې د کړکېچ دوام به د سیمې پر ثبات نامطلوب اغېز وکړي

لخوا Aamaj News

پاکستاني رسنیو نن (دوشنبه د کب دویمه) راپور ورکړی؛ چې د پاکستان د بهرنیو چارو وزیر شاه محمود قریشي د آلمان د بهرنیو چارو وزیر آنالنا بائربوک سره د افغانستان وضعیت په اړه ټلیفوني خبرې کړې دي.

د پاکستان د بهرنیو چارو وزیر په دې ټلیفوني خبرو کې ویلي چې یاد هېواد له افغانستان څخه د تخلیې په عملیاتو کې بنسټیز رول درلود او د یاد رول په دوام یې ټینګار کړی.

قریشي څرګنده کړې؛ چې پاکستان لاتراوسه د څه باندې ۹۰ زره کسانو د تخلیې بهیر آسانه کړی.

د یادو رسنیو د راپور پر بنسټ، شاه محمود قریشي په افغانستان کې د سولې او ثبات د تقویت لپاره د نړیوالې ټولنې له هڅو څخه د ملاتړ په موخه د پاکستان پر عزم ټینګار کړی.

قریشي په دې خبرو اترو کې په افغانستان کې د اقتصادي سقوط او انساني کړکېچ څخه د مخنیوي پر اړتیا ټینګار کړی او زیاته کړې یې ده؛ چې په دې هېواد کې د کړکېچ دوام به د سیمې او له هغې ورهاخوا پر ثبات نا مطلوب اغېز وکړي.

پاکستاني رسنیو له آنالنا بائربوم څخه په نقل قول ویلي؛ چې نوموړي له افغانستان څخه د تخلیې په عملیاتو کې د پاکستان له مرستې ستاینه کړې.

بائربوک په دې برخه کې د پاکستان د ملاتړ له دوام څخه هیله څرګنده کړې.

اړوند لیکنې

یو نظر پریږدئ