د ملګرو ملتونو سرمنشي آنتونیو ګوترش آلمانی مارک پوتزل د ډنمارکي ډيپلوماټ مټه نودسن پر ځای د یوناما سیاسي مرستیال په توګه وګمارلو.
د ملګرو ملتونو په اعلامیه کې راغلي چې د یاد سازمان د استازي نوی مرستیال په نړیواله کچه د ۲۷ کاله ډیپلوماټیک ماموریت ترسره کولو تجربه لري.
نوموړی له ۲۰۱۴ کال څخه تر ۲۰۱۶ کال پورې کابل کې د آلمان سفیر وو او له ۲۰۱۷ کال څخه تر ۲۰۲۱ کال پورې افغانستان کې د یاد هېواد ځانګړی استازی وو.
ښایي پوتزل په داسې حال کې افغانستان کې خپل نوی ماموریت پیل کړي چې د طالبانو په لاس د دې هېواد له سقوط وروسته، په بهرنیو تپ بانکونو کې د افغانستان د شتمنیو کنګل کېدل او دې هېواد ته د پراختیایي مرستو بندیدل، په افغانستان کې یو لوی انسانی ناورین ته لمن وهلې.
د یوناما سیاسي مرستیال په داسې حال معرفي شوی؛ چې دیبورا لاینز تازه په افغانستان کې د یاد سازمان د استازې په توګه خپل ماموریت پای ته ورسولو.
لاینز په ۲۰۲۰م کال کې په یاد مقام وګمارل شوه او لا یې ځای ناستی نه دی معرفي شوی.
