پدرام: په طالباني افغانستان کې اسلام په خطر کې نه؛ غیر پښتون قومونه په خطر کې دي

د افغانستان د ملي کنګرې ګوند مشر لطیف پدرام وايي، چې د طالبانو تر واکمنۍ لاندې افغانستان کې اسلام په خطر کې نه دی، خو غیر پښتانه قومونه په خطر کې دي.

هغه په یو ټويټ کې ليکلي: «د طالبانو تر ولکې لاندي افغانستان کې، قومونو، توکمیزو هویتونو، فارسي ژبه او کلتور، فردي ازادیو، مدني حقونو، د اصلي او غیر افغان/پښتون اوسېدونکو مځکي د تیري، ځپل او اشغال له ګواښ سره مخ دي.»

ښاغلی پدرام په دې باور دی چې افغانستان له ملي ناورین سره مخ او فدرالي نظام یې د حل لاره ده.

هغه تر دې وړاندي د طالبانو له خوا د لویې جرګې په اړه ويلي و لویه جرګه مشکل نه حل نه کوي بلکې مشکل ډېروي.

هغه زیاته کړې وه: «عصري نړۍ عصري عقلانیت عصري وسایلو ته اړتیا لري.»

د ښاغلي پدرام په وینا لویه جرګه یو قومي دود دی او دا دود اوس هم د زورواکو په لاس کې سیاسي وسیله ده.