مقاومت جبهه: د قرآن سوځول د ترهګریزې ډلې له وحشیانه کړنو سره هېڅ توپیر نه لري

لخوا Aamaj News

مقاومت جبهې د سویډن استکهلم ښار کې د قرآن‌کریم سوځول غندلي دي. د یادې جبهې ویاند صبغت‌الله احمدي وایي، چې د قرآن‌کریم سوځول او سپکاوی د یو نیم میلیارد مسلمانانو اعتقاداتو ته مستقیم سپکاوی دی.

احمدي نن (دوشنبه د سلواغې درېیمه) یو ټوېټ کې لیکلي، چې دا کړنه د «وحشاینه ترهګریزو شبکو» له کړنو سره هېڅ توپیر نه لري.

د مقاومت جبهې ویاند زیاته کړې، چې دې «انساني ضد» کړنې شااوخوا د یو نیم میلیارد انسانانو زړونه ټپي کړي.

مقاومت جبهې له ټولو دولتونو غوښتي، چې د بشر ګډو ارزښتونو، اعتقاداتو او مقدساتو ته درناوی وکړي او د ورته «اسلام ضد» کړنو مخنیوی وکړي.

دا په داسې حال کې ده، چې شنبه ورځ د ښي افراطي ګوند رهبر راسموس پالودان استکهلم کې د ترکیې سفارت په وړاندې د قرآن کریم یو جلد وسوځولو، هغه هم له دې وروسته چې د سویډن چارواکو څخه یې د دې کړنې جواز اخیستی وو.

اړوند لیکنې

یو نظر پریږدئ