نی: د طلوع نیوز کارکوونکو نیول په ښکاره ډول د ټوله‌ییزو رسنیو قانون نقض کول دي

د افغانستان آزادو رسنیو ملاتړ کوونکي بنسټ یا نی د طالبانو لخوا د طلوع نیوز کارکوونکو د نیولو په غبرګون کې ویلي: «هغه څه چې د طلوع نیوز کارکوونکو په وړاندې ترسره شوي، په ښکاره ډول د ټوله‌ییزو رسنیو قانون او خبریالۍ اصولو نقض ښکارندوی دی.»

د نی په اعلامیه کې راغلي؛ چې د طلوع نیوز کارکوونکو نیول د طالبانو د ژمنو خلاف کړنه ده.

په دې اعلامیه کې یادونه شوې؛ چې د طلوع نیوز کارکوونکو نیول په داسې حال کې کېږي، چې پنجشنبه ورځ د خبریالانو فدراسیون او رسنیزو بنسټونو د خبریالانو له ملي ورځې څخه نمانځنه وکړه.

دغه بنسټ زیاته کړې: «دا په داسې حال کې ده، چې څه موده وړاندې ذبیح‌الله مجاهد د ټوله‌ییزو رسنیو د قانون پر نافذ کېدو ټینګار وکړ.»

دغه بنسټ له طالبانو غوښتي؛ چې د طلوع نیوز کارکوونکي آزاد کړي، ځکه ورته کړنې د رسنیو تر منځ د وېرې او ځاني سانسور لامل کېږي.

دا په داسې حال کې ده؛ چې تېره شپه (پنجشنبه د کب ۲۶مه) د طالبانو استخبارات طلوع نیوز ته دننه شوي او یاد ټلویزیون د خبر مسوول خپلواک ساپی، د خبر او سیاسي خپرونو پر مخ وړونکی بهرام امان او حقوقي سلاکار نافع خلیق یې نیولي.

بل پلو د طلوع نیوز پخواني رییس، لطف‌الله نجفی‌زاده په خپله ټویټر پاڼه لیکلي؛ چې خپلواک ساپی او نافع خلیق له پلټنو وروسته بېرته آزاد شوي، خو بهرام امان اوس هم د طالبانو په بند کې دی.

طالبان تر اوسه چُپ دي.