د پاکستان د بهرنیو چارو وزیرې، حنا رباني کهر د افغانستان لپاره د دغه هېواد له ځانګړي استازي محمد صادق سره په لیدنه کې ویلي چې اسلام اباد په افغانستان او سیمه کې د امنیت د تامین لپاره ژمن دی.
آغلې کهر ویلي، هېواد یې د افغانستان ملي حاکمیت ته درناوی لري او په افغانستان کې سوله ډېره مهمه ګڼي.
په دغه کتنه کې د پاکستان د بهرنیو چارو وزیرې “د افغانستان له خاورې د پاکستاني امنیتي ځواکونو په نښه کولو” په اړه اندېښنه څرګنده کړېده.
په همدې حال کې د پاکستان د بهرنیو چارو وزیرې د امریکا د کانګریس له غړې الهان عمر سره په لیدنه کې ویلي چې اسلام اباد له واشنګټن سره په بېلابېلو برخو کې د خپلو دوو اړخیزو اړیکو لا پیاوړتیا او متقابلو همکاریو ته لیواله دی.
آغلې کهر زیاته کړې چې پاکستان او امریکا د اوږدې مودې نژدې اړیکې لري.
د پاکستان د بهرنیو چارو وزیرې له افغانستان سره د دغه هېواد د اړیکو د څرنګوالي په اړه دا څرګندونې په داسې حال کې کوي چې په دې هېواد کې د بلوڅ بېلتون غوښتونکو او پاکستاني طالبانو له خوا بریدونه زیات شوي دي.
له بلې خوا په خوست او کونړ ولایتونو د پاکستان وروستیو هوايي بریدونو او د شاوخوا پنځوسو ملکي وګړو وژل کېدو د افغانانو غوسه راپارولې ده.