د خبریالانو نړیوال فدراسیون دا راپور ورکوي چې د طالبانو د واکمنۍ راهیسې په افغانستان کې په سلګونه رسنۍ د اقتصادي ستونزو، ګواښونو او خنډونو له امله تړل شوې دي.
د راپور له مخې، په زرګونو خبریالانو او د رسنیو مسلکي کسانو، او ښځو خپلې دندې له لاسه ورکړي دي.
د یوې سروې له مخې چې د افغانستان د خبریالانو ملي اتحادیې په ۳۳ ولایتونو کې ترسره کړې ده. د طالبانو له واکمنۍ راهیسې ۳۱۸ رسنۍ تړل شوي او له ۶۲۳ رسنیو څخه یوازې ۳۰۵ اوس هم فعالیت کوي.
د راپور له مخې له ۱۱۴ فعالو ورځپاڼو څخه ۲۰ ورځپاڼې، ۵۱ تلویزیوني چینلونه، ۱۳۲ راډیو سټیشنونه، او د طالبانو د واکمنۍ له راتګ راهیسې ۴۹ انلاین رسنیو خپل فعالیت بند کړی دی.
په راپور کې ویل شوي، چې له ۵۰۶۹ خبریالانو څخه یوازې ۲۳۳۴ یې خپل رسنیز فعالیت ته دوام ورکوي او پاتې نورو خبریالانو خپلې دندې له لاسه ورکړي، چې په دویمه ډله کې ۷۲٪ ښځینه خبریالانې شاملې کیږی.
