د جمعیت اسلامي ګوند د صلاح الدین رباني د څانګې مرستیال، احمد ضیا مسعود په یوه فیسبوکي پیغام کې لیکلي دي، چې طالبانو د اشرف غني په مرسته او د وسلو په زور د کابل واک اخیستی دي.
ښاغلي مسعود ویلي دي چې دلته د اشرف غني مرسته د زور او تاوتریخوالي مسله نه ختموي.
نوموړي د دغه پیغام په دوام کې لیکلي دي کله چې امنیه قوماندان تسلیم شي، دا د ټولو امنیتي ځواکونو د تسلیمولو معنی ورکوي. او د عسکر اراده په ټولو قضیو کې معیار نه ګڼل کیږي.
هغه په دې باور دی چې د قوماندان په نشتوالي کې سرتېری نه شي کولای جګړه وکړي.
د جمعیت ګوند مرستیال زیاته کړه چې د اشرف غني تسلیمېدل، د هغه همکاري یا تېښته، دا طالبانو ته د واک د لېږد بهیر نه دیموکراتیک کوي او هر هغه ډله چې د خلکو له رضایت او سیاسي ارادې پرته واک ته ورسېږي، هغه زور او جبر استعمال کړي،چې د منلو وړ نه دي او کوم سیاسي مشروعیت نلري.
