د اوکراین بهرنیو چارو وزیر ناټو ته: اجازه مه ورکوی چې پوتین له اوکراین څخه سوریه جوړه کړي

د اوکراین د بهرنیو چارو وزیر دیمیترو کولبا ویلي؛ چې روسیه غواړي په اروپا کې سوریه جوړه کړي.

نوموړي د ناټو ملاتړو بهرنیو چارو وزیرانو څخه غوښتي؛ چې اجازه ورنه کړي چې روسیه؛ اوکراین په سوریه بدل کړي، هغه ځای چې له ۲۰۱۱ څخه راپدېخوا کورنۍ جګړې پکې دوام لري.

نوموړي په دوام کې څرګنده کړې: “موږ هېڅکله د روسیې ولسمشر ولادیمیر پوتین ته اجازه نه ورکوو، چې خپلې موخې پلې کړي او دې لاره کې به له اقتصادي او ډیپلوماټیکو چارو ګټه واخلو.”

د اوکراین بهرنیو چارو وزیر خبر ورکړی؛ چې د اوکراین په پوله کې روسیي ځواکونه ورځ تر بلې په ډېرېدو دي.

کولبا زیاته کړې؛ چې تېره اونۍ یې هم له خپل امریکایي سیال سره په ګډه ناسته کې ویلي و، چې له روسیې سره شخړه یوازې یوه حل لاره لرې، چې هغه هم ډیپلوماسي ده.

کولبا زیاته کړه: “موږ مبارزې ته چمتو یو او مبارزې ته به دوام ورکوو.”

دا په داسې حال کې ده؛ چې پر اوکراین د روسیې پوځي برید نړیوالې نیوکې له ځان سره درلودې. لا تر اوسه اروپایي ټولنې، امریکا، بریتانیا او نورو هېوادونو پر مسکو سخت مالي بندیزونه لګولي.

په ورته وخت کې؛ لویدیځ همداشان کي‌یف ته د وسلو او بشري مرستو استولو ته دوام ورکوي.

بل پلو ولادیمیر پوتین ویلي؛ چې ټولو ځانګړو شویو موخو ته تر رسېدو پورې به ځانګړي پوځي عملیات دوام ولري.

د ملګرو ملتونو سازمان د بشر حقونو دفتر د راپور پر بنسټ؛ په اوکراین کې د جګړې له پیل حداقل ۳۳۱ عام وګړي وژل شوي او ۶۷۵ کسانو نور ټپیان شوي.

د ملګرو ملتونو سازمان د کډوالو دفتر په یو راپور کې ویلي؛ چې له اوکراین څخه څه باندې ۱.۲ میلیون کسان ګانډیو هېوادونو ته ګډوال شوي.