په پنجشېر کې د ملکي وګړو د نیولو په اړه د کوفي غبرګون؛ هر محکومیت به د یو انقلاب پایله ولري

د افغانستان د بدلون څپې د جریان مشرې، فوزيې کوفي په پنجشېر کې د طالبانو له خوا د ملکي وګړو د نيولو په غبرګون کې ویلی چې هر محکومیت به د يو انقلاب لامل شي.

مېرمن کوفي نن (سه شنبه، وږي ١) په خپل ټویټر کې لیکلي دي چې هر محکومیت به د یو انقلاب پایله ولري؛ یو انقلاب چې پیل یې لکه سونامي خاموش دی.

دا په داسې حال کې ده چې له څو ورځو راهیسې په پنجشېر کې د طالبانو له خوا د لسګونو ملکي وګړو د نیولو ویډیو په ټولنیزو شبکو کې لاس په لاس کیږي. طالب جنګیالیو په دې ویډیو کې دغه ملکي وګړي د ملي مقاومت جبهې غړي بللي دي.

د طالبانو دغه خپلسري نیونې له پراخو غبرګونونو سره مخ شوي دي.