د «طالب علماوو» د ناستې پرېکړه: له ملا هبت‌الله سره د امیرالمومنین او زعیم په توګه بیعت کوو

لخوا Aamaj News

د طالب علماوو درې ورځنۍ ناسته د ټاکنو او د نجونو د ښوونځیو پرانیستو او ټول شموله حکومت جوړېدو لپاره د نړیوالې ټولنې د غوښتنو له یادونې پرته پای ته ورسېده.

په دغه ناسته کې «طالب علماوو» د طالبانو له مشر، ملا هبت‌الله سره بیعت وکړ. «موږ یو ځل بیا له امیرالمومنین هبت‌الله آخندزاده سره خپل بیعت نوی کوو او په پرېکنده یې ملاتړ کوو.»

د دغې ناستې وروستنی پرېکړه لیک له ١١ مادو سره پای ته ورسېد.

د یاد پرېکړه لیک په یوه ماده کې راغلی: «اسلامي امارت د افغانستان خلکو له متن څخه پاڅېدلی او هیڅ بهرني اړخ په هغه کې ځای نه لري. دا یې د داخلي مشروعیت یو موثق دلیل دی.»

د یاد پرېکړه لیک په یوه بله ماده کې له نړیوالې ټولنې غوښتل شوي چې د طالبانو حکومت په رسمیت و پېژني او د افغانستان شتمني باید خوشي شي.

په دغه پرېکړه لیک کې زیاته شوې: «د امارت له راتګ سره بشپړ امنیت ټینګ شوی، د واک جزیرې له منځه تللې دي، فساد، غصب او درغلي ختمه او یو زورور مرکزي نظام رامنځته شوی دی.»

طالب علماوو همدارنګه په نورو هیوادونو کې د نه لاسوهني له سیاست او د افغانستان په چارو کې د نورو هیوادو د نه لاسوهني له غوښتني ملاتړ وکړ.

له بلې خوا هغوی له داعش سره هرډول همکاري ناروا وبلله.

د یاد پرېکړه لیک په یوه برخه کې راغلي چې ملي یوالی دې پیاوړي شي.

دغه علماوو هېواد ته د افغان چارواکو د راستنېدو له پروګرام هم ملاتړ کړی دی.

اړوند لیکنې

یو نظر پریږدئ