طالبانو د مشهد امام رضا حرم کې پر درې روحانیانو برید وغندلو.
د طالبانو ویاد ذبیح الله مجاهد (چهارشنبه د وري ۱۷مه) په یو ټویټ کې ویلي؛ چې دا برید له افغانستان او افغانانو سره کوم تړاو نه لري.
دا په داسې حال کې ده؛ سه شنبه ورځ بریدګر کس د اما رضا حرم په انګړ کې له چاقو سره پر درې روحانیانو برید وکړ، چې په پایله کې یو روحاني ژوند له لاسه ورکړ او دوه نور ټپیان شول.
ایراني چارواکو دا برید «ترهګریز» وبللو او ویې غندلو.
د ایران ولسمشر د یادې پېښې غندلو سربېره وویل: «دا برید د امریکا تکفیري ډلو تر اغېز لاندې شوی.»
د ایران تسنیم خبري آژانس راپور ورکړی؛ چې بریدګر کس عبداللطیف مرادي نومېده، ۲۱ کلن او اوزبېک دی چې یو کال وړاندې د پاکستان له لارې ایران ته دننه شوی.
د ایران امنیتي ځواکو د عبداللطیف مرادي د دوه وروڼو په ګډون شپږ نور کسان هم نیولي.
