هند کې دوه افغانان د مخدره توکو د قاچاق په تور ونیول شول

هندي رسنیو خبر ورکړی چې د دغه هېواد پولیسو دوه افغانان له نوي ډیلي ښار څخه د ۳۱۲ کیلو ګرامه مخدره توکو د قاچاق په تور نیولي دي.

د راپورونو له مخې، د هند پولیسو تېره ورځ (سه شنبه) د نوي ډیلي له میټرو تمځای څخه ۳۱۲ کیلوګرامه هیروئین نیولي دي.

هندي پولیسو د دغو کسانو نومونه مصطفی ستانکزي او رحیم الله رحیم اعلان کړي چې ۲۳ او ۴۴ کاله عمرونه لري.

په راپور کې ویل شوي، مصطفی ستانکزی او رحیم الله رحیم چې له ۲۰۱۶ کال راهیسې په هند کې ژوند کوي، پلان درلود چې د یو مشهور قاچاق وړونکي چې له هېواده بهر اوسیږي، د مخدره توکو یوه لویه پېټۍ ولېږدوي چې د هند د پولیسو له لوري ونیول شول.

ویل کیږي چې د دغو مخدره موادو بیه ۱۲۰۰ کروړه هندي کلدارو ته رسیږي.