د بشري حقونو د نړیوالو سازمانونو اتحاد: د طالبانو په راتګ سره د بشري حقونو وضعیت په پراخ ډول خراب شوی دی

د بښنې نړیوال سازمان په یوه خبرپاڼه کې په افغانستان کې د بشري حقونو د دفاع په موخه د بشري حقونو د نړیوالو سازمانونو د اتحاد د جوړولو اعلان وکړ.

دغه سازمان لیکلي: چې د دغه ټولنې تر چتر لاندې، د بشري حقونو سازمانونه په لومړۍ لیکه کې مدافعین، د ازادۍ کور، د بشري حقونو د څار سازمان، او یو شمیر نور سازمانونه شامل دي.

د بخښنې نړیوال سازمان زیاته کړې چې د ۲۰۲۱ کال د اګست په ۱۵ د حکومت له نسکوریدو او واک ته د طالبانو له راتګ راهیسې په افغانستان کې د بشري حقونو وضعیت په پراخ ډول خراب شوی.

په خبرپاڼه کې زیاته شوې، “په دې هېواد کې جګړه پای ته رسېدلې، خو له بشري حقونو جدي سرغړونې دوام لري. طالبانو په پراخه کچه د بشري حقونو سرغړونې کړې دي او دوام لري، چې په کې بې عدالتي اعدامونه، جبري ورکېدل، سزاګانې، خپل‌سري بندي کول، د ښځو او نجونو له حقونو پراخه محرومیت، سانسور او پر رسنیو بریدونه او د بشري حقونو د مدافعینو په وړاندې غچ اخیستل شامل دي.”

په خبرپاڼه کې زیاته شوې: “د افغانستان ولس له یوه بې مخینې بشري ناورین سره هم مخ دی، چې د افغانستان په اړه د نړیوالې ټولنې په ځانګړې توګه د امریکا متحده ایالاتو د پرېکړو او دریځونو له امله رامنځته شوی، ځکه چې واشنګټن اقتصادي مرستو او نړیوال مالي سیستم ته د دې هېواد لاسرسی بند کړی دی.”

په خبرپاڼه کې د هغه راغلی نقل قول چې: “په داسې حال کې چې د نړۍ غور له یوه ناورین څخه بل ته په چټکۍ سره بدلون کړي، په افغانستان کې بشري ناورین دوام لري. د افغانستان خلک، په ځانګړې توګه ښځې او نجونې یو ځل بیا له خپلو اساسي بشري حقونو بې برخې شوې دي.”

په افغانستان کې د بشري حقونو د ساتنې د نړیوالو سازمانونو ټولنې دا څرګندونې په داسې حال کې کېږي؛ چې طالبان د بشري حقونو په تېره بیا د ښځو په وړاندې د سرغړونو تورونو له ردکولو سره وایي؛ چې د هېواد د اتباعو ټول حقوق د اسلامي شریعت له مخې ورکول کېږي. خو دا ځواب نه ورکوي چې ایا د «طالبانو شریعت» له اسلامي لارښوونو سره سم دی او که نه؟