د بښنې نړیوال سازمان وايي د طالبانو د واکمنۍ پر مهال، د بیان ازادي او د ازادۍ حق په بې ساري توګه محدود شوي.
دغه سازمان په یوه راپور کې چې نن (دوشنبه، د وری لومړۍ) یې خپور کړی ویلي، داسې ښکاري چې د ښځو جبري ورکېدل، د خبريالانو او مدني فعالانو په خپل سر بندي کول د طالبانو وروستي تاکتيکونه دي چې غږونه چُپ کړي.
دغه سازمان ټینګار کړی؛ چې د طالبانو حکومت باید د بشري حقونو نړیوال معیارونه رعایت کړي او ټولو افغانانو ته اجازه ورکړي چې له وېرې پرته په ازاده توګه خپل حقونه وکاروي.
د بښنې نړیوال سازمان ویلي؛ چې دوی د خپل سرو نیولو نهه قضیې مستند کړي دي او دا چې د طالبانو لخوا غیرقانوني نیونې او په زوره ورکیدل د هغو کسانو په وړاندې ترسره شوي چې د سوله ایزو لاریونونو یا د بیان د ازادۍ د حق د کارولو له لارې یې طالبان تر پوښتنې لاندې راوستل.
د بښنې نړیوال سازمان د راپور له مخې، د روان میلادي کال په تېرو دوو میاشتو کې د ماشومانو په ګډون له ۶۰ ډېر کسان د طالبانو له خوا په خپلسري او غیر قانوني توګه بندیان شوي دي، د دې سازمان په وینا ښايي دا شمېره د هغه څه په پرتله لوړه وي چې رسنیو یې راپور ورکړی دی.
د بښنې نړیوال سازمان همداشان ویلي: “موږ پر طالبانو غږ کوو چې ټول هغه کسان چې له خپلو حقونو څخه د ګټې اخیستنې له امله نیول شوي دي، ژر تر ژره او پرته له شرطه خوشې کړي.”
د بښنې نړیوال سازمان ویلي، نړیواله ټولنه، د سیمې هېوادونه او نور هغه هېوادونه چې له طالبانو سره مستقیم اړیکې لري، باید له دې ډلې وغواړي چې د بشري حقونو نړیوال قانون ته درناوی وکړي او ملاتړ یې وکړي.
د بښنې نړیوال سازمان تر دې مخکې په افغانستان کې د خپلسری توقیفونو په ځانګړې توګه د ښځو د وضعیت په اړه اندېښنه ښودلې وه.
دغه سازمان ټینګار کړی و؛ چې د ۲۰۲۱ کال د اګست له ۱۵مې راهیسې په ټول افغانستان کې د ښځو او نجونو پر حقونو پراخ محدودیتونه وضع او پلي شوي دي.
د بښنې نړیوال سازمان زیاته کړې وه؛ چې ښځو ته ویل شوي چې دوی نشي کولی کار ته ستنې شي یا له نارینه پرته آزاد سفر وکړي.
