د نیوزیلند نوی نسل به سګرېټو ته لاسرسی ونه لري

د نیوزیلند رسنیو د راپور له مخې؛ دا هېواد به د راتلونکي نسل لپاره د تنباکو پلور بند کړي، تر څو راتلونکي کې له سګرېټ څکولو لاس واخلي.

د هغې لایحې پر بنسټ چې ښایي راتلونکی میلادي کال به تصويب شي، هر هغه څوک چې له ۲۰۰۸ م کال وروسته زېږېدلي وي، سګرېټ او نورو تنباکویي محصولاتو ته به د لاسرسي حق ونه لري.

د نیوزلنډ د روغتیا وزیره؛ عایشه ورال وایي، «موږ غواړو ډاډ ترلاسه کړو چې نوی نسل هېڅکله د سګرېټ څکول نه پیلوي.»

دا تګ لاره نن پنجشنبه د نیوزیلنډ روغتیا وزارت اعلان کړه؛ چې روغتیایي متخصصینو او روغتیاپالانو هم ورڅخه ستاینه کړې ده.

د نیوزیلنډ د یادې تګ لارې پر بنسټ تر ۲۰۲۵ م کال پورې به پر سګرېټ د اخته کسانو شمېر په سلو کې تر ۵ سلنې را کم شي. په اوس مهال کې ۱۳ سلنه نیوزیلنډیان سګرېټ څکوي چې دا شمېره تېره لسیزه کې ۱۸ سلنه وه او اوس کمه شوې.

د نیوزیلنډ د رسنیو د راپور له مخې؛ چې د سګرېټو د پلور مرکزونه به له ۸۰۰۰ څخه یوازې ۵۰۰ ته راښکته شي.

همداشان د نیوزیلنډ د روغتیا وزارت زیاته کړې، چې په یاد هېواد کې پر سرطان ناروغۍ له څلور کسانو یو کس د سګرېټو له امله پر یاده ناروغۍ اخته کېږي.