د امریکا ځانګړې استازې: د نجونو د ښوونځیو تړل کېدو د طالبانو ترمنځ دوه ډلې رامنځته کړې دي

لخوا Aamaj News

د افغانستان ښځو او بشر حقونو لپاره د امریکا ځانګړې استازې رینا امیري په دوحه کې له «ټي آرټي ورلد» سره په مرکه کې ویلي؛ چې طالبانو په خپلو ژمنو عمل نه دی کړی او که دوی نړیوال شرطونه پوره نه کړي، بندیوزونه نه کمېږي او دوی په رسمیت نه پېژندل کېږي.

نوموړې زیاته کړې؛ چې له شپږم ټولګي د پورته د نجونو ښوونځیو بند پاتې کېدل ناهیلي کوونکي دي، ځکه د نوموړې په باور دا د طالبانو لپاره یوه کلیدي آزموینه وه.

رینا امیري زیاته کړې؛ چې طالبان د نجونو د زدکړو ممنوعیت په اړه د نظر اختلاف لري او یو شمېر یې د ښوونځیو پرانېستل ښه پرېکړه بولي.

نوموړې د نجونو د زده کړو بندیدو په تړاو د طالبانو پرېکړه د نړۍ اسلامي هېوادونو په منځ کې یوه بې مخینې پرېکړه بللې ده. د امریکا ځانګړې استازې څرګنده کړې: «د ټولنې پیاوړتیا، څه له اقتصادي او څه له امنیتي اړخه د ښځو پیاوړتیا ورته اړینه ده.»

نوموړې په دوام کې د افغانستان خلک د طالبانو په وړاندې د فشار زور وبلل او ویې ویل: «د افغانستان ښځې یوازې نه دي. دوی قرباني نه، بلکې رهبرانې دي او امریکا یې تر څنګ درېږي.»

د نوموړې په وینا د افغانستان خلکو هم د طالبانو یادې پرېکړې په تړاو خپله ناخوښي څرګنده کړې او د دې هېواد خلک د نجونو د زدکړو طرف‌دار دي.

د امیري دا خبرې په داسې حال کې کېږي؛ چې نوي ښوونیز کال په پیل کې د نجونو له شپږم ټولګي د پورته ټولګیو له تړل پاتې کېدو وروسته، په دې اړه غبرګونونه اوج ته رسېدلي.

اړوند لیکنې

یو نظر پریږدئ