طالبانو غور کې یو ځوان د یوې پیغلې د ځورونې له امله ۳۵ دورې وهلی

طالبانو په غور کې یو ځوان پر یوه نجلۍ د «جنسي تېري او ځورونې» له امله؛ په ۳۵ دورو او یوه میاشت بند محکوم کړی.

غور کې د طالبانو رسنیز دفتر په یوه خبرپاڼه کې ویلي؛ چې دا ځوان مهدي نومېږي او د یاد ولایت د لعل او سرجنګل ولسوالۍ اوسېدونکی دی.

په خبرپاڼه کې راغلي؛ چې مهدي د یادې نجلۍ د شکایت پر بنسټ نن سه شنبه د اړوند بنسټونو تر څېړنو لاندې شو او له هغې وروسته د یاد ولایت د لعل او سر جنګل ولسوالۍ د لومړنۍ محکمې لخوا ورباندې شرعي حدود پلې شول.

دا په داسې حال کې ده؛ چې تېره ورځ هم یو ځوان د یوې پیغلې د ځورولو له امله د یاد ولایت د ښاري محکمې لخوا په ۲۹ شرعي دورو محکوم او سزا ورکړل شوې وه.