د طالبانو بهرنیو چارو وزیر، امیرخان متقي د طالبانو پخواني رهبر ملا اختر محمد منصور په شپږم تلین کې ادعا کړې؛ چې په پنجشېر او اندراب کې د مقاومت په نوم کوم څه شتون نه لري.
دا په داسې حال کې ده؛ چې دې ورستیو کې د پنجشېر د جګړې زور د طالبانو د دفاع وزیر پښه یاد ولایت ته ورسوله او طالبان اړ شول چې د دویم ځل لپاره یاد ولایت تازه دمي پوځي ځواکونه ولېږي.
بل پلو؛ متقي په یو ډول انقره کې له سیاسي څېرو څخه جوړې د «د افغانستان ژغورلو د آزادۍ جبهې» ته په اشارې سره ویلي، له هېواد څخه بهر د خیالي جبهو اعلان جدي او د اندېښنې وړ نه دي.
د طالبانو بهرنیو چارو وزیر یو ځل بیا د بشر حقونو کمیسیون په ګډون د یو شمېر کمیسیونونو له ملغا کېدو خوښي څرګنده کړې او زیاته کړې یې ده؛ چې د بشر حقونو کمیسیون لغوه کول د طالبانو سمه پرېکړه وه.
متقي همداشان څرګنده کړې: «موږ په ټول افغانستان کې د بشر حقونو کمیسیون پر ځای عدلي دستګاوې فعاله کړې.»
متقي په دې اړه چې تېره ورځ یې د افغانستان لپاره د امریکا متحده ایالاتو له ځانګړي استازي تام وسټ سره ټیلفوني خبرې درلودې وویل؛ چې افغانستان کې تېرو درې میاشتو کې هېڅ ښځې ځان وژنه نه ده کړې او کابل کې هېڅ امنیتي پېښه نه ده شوې؛ د نوموړي په وینا، دا خپله یوه لاسته راوړنه ده.
متقي په داسې حال کې دا خبرې کړي؛ چې هره ورځ په بېلا بېلو ولایتونو په ځانګړي ډول د افغانستان پنجشېر، بغلان او تخار ولایتونو کې د طالبانو له هدف ګرځېدو څخه راپورونه خپرېږي.
