په هيواد کي د قومي جګړې اندېښنې؛ عمر صدر: افغانستان د قومي جګړې نوي پړاو ته داخلیږي

شمال ته د جنوب لخوا د طالبانو لښکر کشۍ په ځانګړې توګه په پنجشېر، اندراب او تخار کي او په اکثریت تاجیک مېشتو سیمو کې د ملکي وګړو شکنجه او وژلو سخت غبرګونونه راپارولي دي.

څېړونکي او د پوهنتون استاد عمر صدر په یو ټویټ کي لیکلي: «طالبان پښتانه دې ته هڅوي څو تاجیکان چي د طالبانو واکمني نه مني تر خپل سلطې لاندي راولي. طالبان په قصدي توګه تاجیک ملکيان وژني، چي دا یو جنګي جنایت دی.»

ښاغلی صدر زیاته کړې: «په تیرو وختونو کې ډیرو دا خبره رد کړې، خو افغانستان د توکمیزي جګړې نوي پړاو ته داخلیږي. ولي تاجیکان باید د طالبانو واکمني ومني؟»

د بشري حقونو مدافع فواد پویا هم د اوسني وضعیت په اړه غبرګون ښودلې او ویلی: «د پنجشېر جګړې دا څرګنده کړه چې طالبان پنجابیان بلل یو درواغ دی. له خوست، پکتیا، اروزګان، زابل، کندهار او هلمند څخه د طالبانو جنګیالي جذبول وښودله چې طالبان بهرني نه دي، د پښتنو د کلیوالي طبقې استازیتوب کوي. په شمال کې د جنوبي پښتنو وسله وال بریدونه به یوازي د افغانستان په نوم د یوه هیواد ژوند لنډ کړي.»

د پوهنتون استاد یعقوب یسنا هم په شمال کې د جګړې لپاره د سویلیانو د راټولېدو په اړه غبرګون ښودلې او ویلی يې دی: «ملا یعقوب وايي چې د مصلحت لپاره پر خوست او سویل د پاکستان برید له پامه غورځوي. خو هغه له خوست او جنوب څخه د تاجیک او فارسي ژبو د وژلو لپاره پښتانه راټولوي. له دې ډلي سره به د هیوادوالي راتلونکی څه ډول وي؟»

دا کلک غبرګونونه په داسي حال کي کیږي چي طالبانو سلګونه جنګیالي د افغانستان له سویل څخه شمال ته استولي دي او په هیواد کي د یوې توکمیزي جګړې د پیل اندېښنه یې زياته کړې.