د ملي مقاومت شورا: افغانستان د پولې هاخوا ترهګرو په مرکز بدل شوی دی

لخوا Aamaj News

د افغانستان د ژغورنې لپاره د مقاومت عالي شورا په کابل کې د امریکا د بې پیلوټه الوتکې له خوا د القاعدې د مشر د وژل کېدو په غبرګون کې وايي چې افغانستان د پولې هاخوا ترهګرو په مرکز بدل شوی دی.

یاده شورا په یوه اعلامیه کې پر طالبانو د لا زیاتو بندیزونو غوښتنه کړې ده.

د ژغورنې لپاره د مقاومت عالي شورا په دغه اعلامیه کې ویلي دي چې د القاعدې د مشر وژل کیدل له ترهګرو ډلو سره د طالبانو د اړیکو ژورتیا یو ځل بیا څرګنده کړه.

دغې شورا زیاته کړې چې په کابل کې د القاعدې د مشر وژل کېدل دا حقیقت په ډاګه کړ چې طالبانو د افغانستان له نیولو وروسته دغه هېواد د القاعدې او نورو ترهګرو ډلو په امن پټنځای بدل کړی دی.

د افغانستان د ژغورنې لپاره د مقاومت عالي شورا ټینګار کړی، مخکې له دې چې ډېر ناوخته شي او فرصتونه له لاسه ووځي، نړیواله ټولنه باید پر طالبانو لا زیات بندیزونه ولګوي څو دغه ډله د افغانانو غوښتنو ته غاړه کښېږدي.

ایمن الظواهري دوې ورځې وړاندې په کابل کې په یوه کور کې چې ویل کېږي د سراج الدین حقاني د یوه مرستیال سره تړاو لري، د امریکا د بې پیلوټه الوتکې په برید کې ووژل شو.

اړوند لیکنې

یو نظر پریږدئ