چین او پاکستان: په اوکراین کې د جګړې له امله په افغانستان کې بشري ناورین باید له پامه ونه غورځول شي

د پاکستان د بهرنیو چارو وزارت تېره ورځ خبر ورکړی چې د پاکستان د بهرنیو چارو وزیر شاه محمود قریشي او د چین د بهرنیو چارو وزیر وانګ یي په یوه ټلیفوني مرکه کې له نړسوالې ټولنې غوښتي، چې له افغانانو سره خپلو بشري مرستو ته دوام ورکړي.

دواړو لورو دغه راز د دوه اړخیزو اړیکو او د سیمې او نړۍ پر حالاتو هم خبرې کړې دي.

په یاده اعلامیه کې راغلي؛ چې دواړو د بهرنیو چارو وزیرانو په افغانستان کې د سولې او ثبات لپاره د روانو هڅو په اړه خبرې او له دغه هېواد سره یې د بشري مرستو پر دوام ټینګار کړی.

دواړو لورو د اوکراین کړکیچ ته په اشارې سره د دواړو خواوو ترمنځ د نړیوالو قوانینو او د ملګرو ملتونو د منشور له ګټو سره سم د ډیپلوماټیک حل لارې پر اړتیا ټینګار کړی.

دا په داسې حال کې ده؛ چې پر اوکراین د روسیې له پوځي یرغل نږدې دوه اوونۍ تېرېږي او په دې نښتو کې سلګونت کسان وژل شوي او نږدې یو میلیون کسان بېځایه شوي.

په ورته وخت کې؛ د اوکراین له کړکېچ وروسته د نړۍ پام هغه هېواد ته اوښتی او داسې اندېښنې شته چې په افغانستان کې روان بشري ناورین؛ د نړۍ له هېوادونو هېر شي.