د ملګرو ملتونو د بشري حقونو د شورا ځانګړي رپورټر ریچارډ بنیټ ویلي دي چې طالبانو په افغانستان کې د ښځو د حقونو د تر پښو لاندې کولو لپاره «قصدي» پالیسي غوره کړې ده.
ښاغلي بنیټ پرون د ملګرو ملتونو د عمومي اسامبلې په څنډه کې د «جنسیتي آپارتاید سره د مبارزې» په نوم په یوه غونډه کې زیاته کړی چې د افغان ښځو او نجونو تر منځ «نا امیدي» شته او «نړیوالې ټولنې له هغوی سره خیانت کړی دی.»
په همدې حال کې، په افغانستان کې د ملګرو ملتونو د بشريحقونو د شورا ځانګړې رپورټر ټینګار کړی چې په نړیواله ټولنه کې د افغان ښځو او نجونو دا بې باوري «یوازې په عملي اقداماتو سره حل کیدی شي، نه د غندنې او خواخوږۍ په څرګندولو.»
ریچارډ بینیټ دې ته په اشارې سره چې افغان ښځې باید د افغانستان په دننه او په نړیوالو بنسټونو کې په سیاسي پریکړو کې د پام وړ رول ولري، زیاته کړه: «له افغان ښځو سره باید خبرې وشي، نه د هغوی په اړه.»
د ملګرو ملتونو د بشريحقونو د شورا ځانګړې رپورټر وویل: «جنسي ځورونه یو نړیوال جرم ګڼل کیږي. خو جنسیتي آپارتاید داسې نه دي.»
بینیټ همداراز وړاندیز وکړ هغه خلک چې د بشري حقونو سرغړونه کوي باید ورباندې بندیز ولګول شي.
د يادونې وړ ده چې د جمعې په ورځ ملګرو ملتونو د لومړي ځل لپاره په افغانستان کې د «جنسي آپارتاید» د څېړلو په موخه د هېوادونو او د بشريحقونو د سازمانونو د استازو په حضور کې غونډه وکړه.
په دې غونډه کې په افغانستان کې د بشري او ښځو د حقونو لپاره د امریکا ځانګړي استازې رینا امیري، ریچارډ بینیټ او د ملګرو ملتونو یو شمېر استازو خبرې وکړې.
