بلخاب کې د جګړې درېیمه ورځ؛ طالبانو خپل بریدونه بیا پیل کړي

لخوا Aamaj News

سرپل کې سیمه‌ییزې سرچینې آماج ته وایي چې طالبانو د یاد ولایت بلخاب ولسوالۍ کې د مولوي مهدي ځواکونو پر پوستو بریدونه له څو ساعته دمې وروسته بیا پیل کړي.

د سرچینې په وینا؛ د تېرې ورځې (جمعه د چنګاښ درېیمې) په نښتو کې ۱۴ طالبانو ژوند له لاسه ورکړی او ۱۰ کسان نور ټپیان شوي.

سرچینه وایي چې طالبانو د سمنګان ولایت د دره صوف ولسوال له دې امله وژلی چې ښه جګړه یې نه ده کړې.

سرچینه زیاتوي چې د تېرې ورځې په نښته کې د مولوي مهدي هم دوه کسان وژل شوي او څلور کسان نور ټپیان شوي.

دا په داسې حال کې ده چې بلخاب کې د طالبانو جګړه درېیمې ورځې ته غځېدلې. د مولوي مهدي ځواکونه وایي چې تر اوسه یې د طالبانو څو تهاجمي بریدونه په شا تمبولي او دوی ته یې سخته مرګ ژوبله اړولې ده.

خو طالبانو تر اوسه د بلخاب د جګړې په اړه هېڅ هم نه دي ویلي.

اړوند لیکنې

یو نظر پریږدئ