بلخ کې د یوې کورنۍ اوه غړي په مرموز ډول وژل شوي

بلخ کې د طالبانو امنیتي مسوولین دې ولایت کې د یو کورنۍ د ښځو او ماشومانو په ګډون د اوه تنو له وژل کېدو خبر ورکوي.

بلخ کې د طالبانو امنیه قومندانۍ ویاند محمد آصف وزیري وایي؛ چې دا پېښه تېره شپه د بلخ ولایت چمتال ولسوالۍ په «جرقعله» سیمه کې شوې ده.

د نوموړي په وینا وژل شویو کې څلور ماشومان او دوې ځوانې ښځې هم شتون لري.

بلخ کې د طالبانو امنیه قومندانۍ ویاند زیاتوي؛ چې ناپېژنده وسلوالو کسان د شپې لخوا د دې کورنۍ کور ته دننه شوي او وروسته یې د دې کورنۍ ټول غړي په ډزو وژلي.

نوموړي زیاته کړې، چې د دې کورنۍ د غړو د قتل انګېزه مالومه نه ده؛ خو د دې پېښې په اړه څېړنې روانې دي.