د آسیا پراختیايي بانک: تر هغې چې افغانستان کې د طالبانو حکومت په رسمیت نه وي پېژندل شوی، پر “ټاپي” به کار ونه کړو

د پاکستان نیوز انټرنېشنل، راپور ورکړی؛ چې د پاکستان د انرژۍ وزارت یوه جګ پوړي چارواکي په اسلام اباد کې د ترکمنستان له چارواکو سره د وروستۍ ناستې راپور ته په اشاره ویلي؛ چې د آسیا پراختیايي بانک د ټاپي پروژې د تمویل ټولې چارې ځنډولې او دا پروژه په ټپه درېدو سره مخ ده.

په یاد راپور کې راغلي، چې د آسیا پراختیايي بانک د ټاپي لس میلیارد ډالرې پورژې تمویل درولی.

په ورته وخت کې؛ د یو پاکستاني جګ پوړي چارواکي د خبر پر بنسټ د ترکمنستان، افغانستان، پاکستان او هند ترمنځ د ګازو د لېږد پروژې تمویل چې ډېره برخه یې له افغانستانه تېرېږي، د اسیا پراختیايي بانک له لوري د اوسني حکومت د په رسمیت نه پېژندلو له امله درېدلې.

دغه رسنۍ همداراز راپور ورکړی؛ چې د آسیا پراختیايي بانک یوه ویاند چې نه یې غوښتل نوم یې واخیستل شي، دا منلې چې د ټاپي پروژې د تمویل چارې تر بلې خبرتیا پورې ځنډول شوی او تر هغې چې افغانستان کې د طالبانو حکومت په رسمیت ونه پېژندل شي، پر ټاپي به کار ونه شي.

دا په داسې حال کې ده؛ چې د ټاپي پروژې تمویل او همغږی کوونکی د آسیا پراختیایي بانک دی.

د ټاپي د ګازو نل لیکه شااوخوا ۱۸۰۰ کیلومتره اوږدوالی لري، چې ۷۵۰ کیلومتره یې افغانستانه کې تېرېږي، چې د ګاز یاد پایپ لاین له ترکمنستان څخه پاکستان او هند ته د هرات، فراه، هلمند او کندهار ولایتونو باندې تېرېږي.

څلور کاله وړاندې په هرات کې د ټاپي پروژې د پرانېستلو پر مهال د ترکمنستان ولسمشر او د پاکستان د صدراعظم په شتون کې د افغانستان تښتېدلي ولسمشر محمد اشرف غني ژمنه کړې وه؛ چې د ټاپي ګاز به د دوه کاله وروسته، مانا تر ۱۳۹۸ لمریز کال پورې د هرات د خلکو کورونه روښانه کړي. خو دا ژمنه پوره نه شوه او اشرف غني د روان کال د زمري میاشتې په ۲۴مه کابل ته د طالبانو په دننه کېدو سره وتښتېد.