توماس وست، نماینده‌ی ویژه‌ی ایالات متحده‌ی امریکا برای افغانستان می‌گوید که کشورش با تاجیکستان برای آغاز روند سیاسی مسالمت‌آمیز که همه جامعه‌های افغانستان در آن مشارکت داشته باشند، هم‌نظر است.
آقای وست ام‌روز (پنج‌شنبه، ۱۲ جوزا) با نشر توییت‌هایی نگاشته است که با امام‌علی رحمان، رییس‌جمهور تاجیکستان، وزیر امور خارجه و فرمانده نیروهای مرزی این کشور دیدار کرده است.
نام‌برده علاوه کرده است که تاجیکستان دارای مرز طولانی و کوهستانی با افغانستان است و نگرانی‌های مشروع در مورد تهدیدهای امنیتی دارد.
او افزوده است که ایالات متحده‌ی امریکا از نظارت و مدیریت قوی و توان‌مند مرزها حمایت می‌کند.
آقای وست اضافه کرده است: «امریکا به درخواست تاجیکستان برای ظهور یک پروسه‌ی سیاسی مسالمت‌آمیز که در آن همه جامعه‌های افغانستان مشارکت دارند، شریک است. بدون آن، افغانستان به سمت بی‌ثباتی بیش‌تری پیش میرود»
او افزوده است که امریکا به رای‌زنی و هم‌کاری نزدیک با تاجیکستان در مورد افغانستان ادامه خواهد داد.
باید یادآور شد که نماینده ویژه‌ی امریکا پیش از این به شماری از کشورهای منطقه سفر داشته و با چهره‌های سیاسی افغانستان دیدار کرده است.
