پوتین و رحمان در مورد «تحولات نگران‌کننده اخیر در افغانستان» صحبت کردند

توسط Aamaj News

دفتر رسانه‌یی امام‌علی رحمان، رییس جمهور تاجیکستان در خبرنامه‌ی از صحبت تلفنی رییس‌جمهور رحمان با ولادیمیر پوتین، رییس‌جمهور روسیه در مورد وضعیت افغانستان خبر داده است.

در این خبرنامه آمده: «سران دو کشور در مورد تحولات نگران‌کننده‌ وضعیت افغانستان در چند وقت اخیر و وضعیت مرز تاجیکستان و افغانستان نیز صحبت کرده‌اند.»

دفتر رسانه‌یی رییس‌جمهور تاجیکستان افزوده: «رییسان‌جمهور دو کشور هم‌چنین بر اهمیت تقویت بیشتر هم‌کاری‌های دو کشور در حوزه امنیتی تأکید کرده و درباره برخی از موضوعات منطقه‌یی و جهانی نیز تبادل نظر کردند.»

اگر چه دفتر رسانه‌یی رییس‌جمهور تاجیکستان توضیح بیش‌تر در مورد «تحولات نگران کننده» نداده؛ اما به نظر می‌رسد جنگ پنجشیر و حمله موشکی از خاک افغانستان به سوی تاجیکستان به نگرانی منطقه‌یی در مورد وضعیت افغانستان افزوده است.

تاجیکستان از حامیان جبهه‌ی مقاومت به شمار رفته و رییس‌جمهور رحمان به حفظ حقوق اقوام به‌ویژه تاجیک‌ها در افغانستان تاکید دارد. دوشنبه از متحدان نزدیک مسکو نیز به حساب می‌آید.

پست‌های مرتبط

نظر بگذارید