ولادیمیر پوتین، رییس‌جمهور روسیه روز گذشته از وضعیت امنیتی در مرز افغانستان و تاجیکستان ابراز نگرانی کرده است.
آقای پوتین در حالی در این مورد ابراز نگرانی کرده است که هم‌زمان مسکو از پایان یافتن مرحله‌ی اول مجهزسازی نیرو‌های تاجیکستان خبر داده است.
خبرگزاری ایترتاس به نقل از سفیر روسیه در دوشنبه گزارش داده است که، وسایط زرهی، سلاح‌های تهاجمی و یک دست‌گاه راکت «اس ۳۰۰» در تاجیکستان مستقر شده‌اند.
او افزوده که روسیه و تاجیکستان با دقت اوضاع افغانستان را تحت نظر دارند.
پیش از این مسکو، از ورود احتمالی شورشیان بنیادگرا، از افغانستان به تاجیکستان و جمهوری‌های اتحاد جماهیر شوروی پیشین، ابراز نگرانی کرده بود.
این در حالی‌ست که روسیه در همین ماه اعلام کرده بود که پای‌گاه‌های نظامی‌اش را در تاجیکستان، با ۳۰ تانک جدید مجهز می‌سازد.
