احمد مسعود و نماینده‌گان طالبان ممکن در آینده نزدیک در دوشنبه باهم دیدار کنند

توسط Aamaj News

خبرگزاری اسپوتنیک تاجیکستان گزارش داده که جبهه‌ی مقاومت ملی به رهبری احمد مسعود، مصمم به برگزاری نشستی در تاجیکستان با حضورداشت نماینده‌گان طالبان است.

هرچند تاریخ دقیق برگزاری این نشست مشخص نشده؛ اما گفته شده است که نماینده‌گان حزب‌های سیاسی، روشن‌فکران، و چهره‌های سرشناس که در حدود پنجاه نفر می‌شوند، در این نشست حضور خواهند داشت.

اسپوتنیک به نقل از منابع‌اش در جبهه‌ی مقاومت ملی افزوده است که هدف این نشست پیدا کردن راه‌حل سیاسی به بحران موجود افغانستان و تشکیل حکومت همه‌شمول‌ با حضور همه گروه‌های سیاسی در این کشور می‌باشد.

با این حال، سفارت افغانستان در تاجیکستان در‌ گفت‌وگو با رسانه‌ها از برگزاری این نشست اظهار بی‌خبری کرده و وزارت امور خارجه‌ی تاجیکستان نیز گفته است که این موضوع را تایید و یا رد نمی‌کند.

قابل ذکر است که خبر نشست جبهه‌ی مقاومت پس از دیدار پوتین از تاجیکستان منتشر می‌شود، دیداری که رییس‌جمهور روسیه بار دیگر بر ایجاد حکومت همه‌شمول با حضور همه قوم‌های افغانستان تاکید کرد.

این اظهارات در حالی صورت می‌گیرد که طالبان حکومت شان را تک‌قومی نمی‌دانند؛ آگاهان اما ساختار حکومت طالبان را تک‌قومی و برآیند ادامه‌ی وضع موجود را جنگ داخلی می‌دانند.

پست‌های مرتبط

نظر بگذارید