سفیر روسیه در تاجیکستان: حدود ۶۰۰۰ تروریست در شمال افغانستان جابه‌جا اند و در بهار سال آینده ممکن فعالیت شان بیش‌تر شود

توسط Aamaj News

خبرگزاری تاس روسیه گزارش داده است که ایگور لیاکین فرولوف، سفیر روسیه در تاجیکستان گفته که جنگ‌جویان وابسته به گروه‌های مختلف تروریستی در شمال افغانستان تهدیدی برای تاجیکستان می‌باشد.

او افزوده که «تهدید به صورت جدی وجود دارد، بر بنیاد برخی گزارش‌ها، حدود ۶ هزار جنگ‌جو در مناطق شمالی افغانستان متمرکز شده‌اند. بزرگ‌ترین خطر از جانب سازمان‌های تروریستی است که شهروندان کشورهای آسیای میانه و برخی مناطق روسیه در آن حضور دارند‌. این سازمان‌ها شامل داعش، جماعت انصارالله و جنبش اسلامی ازبیکستان می‌باشند.»

آقای فرولوف اضافه کرد‌: «همه می‌دانیم همین‌که در زمستان جاده‌های اصلی و راه‌ها از برف پوشیده شود، فعالیت‌های آن‌ها (گروه های تروریستی) کاهش می‌یابد چیزی که در مناطق کوهستانی افغانستان معمول است. اما با تغییر فصل آنان فعالیت‌های شان را از سر می گیرند.»

این دیپلومات روسی تاکید می‌کند که باید آماده هر گونه اقدام‌های غافل‌گیرانه از جانب تروریست‌ها باشند. زیرا به قول او روابط طالبان با دیگر گروه‌های تروریستی مشخص نبوده و آینده‌ی این روابط را نمی‌توان پیش‌بینی کرد.

این درحالی‌ست که پیش‌تر امام علی رحمن، رییس‌جمهور تاجیکستان از درگیری گروهای تروریستی در مرز افغانستان و تاجیکستان خبر داده و گفته بود که در حدود ۴۰ کمپ آموزشی تروریستی در شمال افغانستان وجود دارد.

پست‌های مرتبط

نظر بگذارید